Xabaringiz bor, haftaning har juma kuni Sirdaryo viloyatining tuman (shahar)lari maktablariga «Ochiq eshiklar kuni» munosabati bilan press-turlar tashkil qilinmoqda. Bu galgi press-turimiz Guliston shahar maktablarida bo’lib o’tdi.

Sirdaryo teleradiokompaniyasi ijodkorlari va mahalliy matbuotchilar ishtirokidagi birinchi press-tur Guliston shahridagi 3-umumta’lim maktabida tashkil etildi.

Guliston shahar 9-umumta’lim maktabida bo’lib o’tgan navbatdagi press-turimizda OAV vakillari mazkur ta’lim muassasasi bilan hamkorlikni yo’lga qo’ygan Yo’l harakati xavfsizligi boshqarmasi hamda viloyat Bojxona boshqarmasi tomonidan tashkil etilgan sinf soatlari hamda to’garaklar bilan yaqindan tanishdilar.

Mazkur ta’lim muassasasida «Mohir qo’llar», «English language», «Vatan tayanchi», «Yosh kitobxon», o’quvchilarning aqliy salohiyatini rivojlantirish maqsadida mental arifmetika, shaxmat-shashka to’garaklari faoliyat olib bormoqda. Ushbu to’garaklar va mahoratli o’qituvchilar sa’y-harakati bilan joriy 2024-yilning o’zida 9-11-sinf o’quvchilarning 17 nafari ingliz tili, koreys tili hamda rus tilidan til bilish sertifikatlari hamda 10-sinf o’quvchisi Ko’chimova Rayhona IELTS dan 7 ballni qo’lga kiritgan.

Press-tur so’ngida «Jadidlar izidan» to’garagi qatnashchilari tomonidan jadidlar hayotiga doir sahna ko’rinishlari namoyish qilindi.

Tur so’ngida OAV vakillari va jurnalistlar 12-umumiy o’rta ta’lim maktabida bo’lishdi.

Ulug’obod mahallasida joylashgan mazkur maktab 2006-yil qayta mukammal ta’mirlangan bo’lib, uning o’quvchi sig’imi 392 o’rinli, bugungi kunda 2 ta navbatda 1109 nafar o’quvchi ta’lim olmoqda. Ta’lim tili o’zbek va rus tilida. Barcha tuman(Shahar)lardagi kabi 12-umumiy o’rta ta’lim maktabida ham o’quvchilarning shaxmat sirlarini o’rganishlari uchun zarur sharoitlar yaratilgan va o’g’il-qizlar ushbu sport turini puxta o’zlashtirishmoqda.

Maktabda 10 dan ortiq fan to’garaklari, «Al-Xorazmiy izdoshlari», «Yosh biologlar», «I love English», «Algoritm», «Qiziqarli matematika» va bir qancha «Yengil atletika», «Shaxmat» kabi sport to’garaklari mavjud. Eng quvonarlisi, 1-sinfdan 11-sinfgacha har bir fan doirasida ochiq darslar tashkil qilingan.
Tadbir davomida o’quvchilar tomonidan faollar zalida musiqiy chiqishlar, xor va qo’g’irchoq teatri jamoalari tomonidan «Bo’g’irsoq» ertagi namoyish qilindi.

Sirdaryo viloyati MMTB axborot xizmati