So‘nggi kunlarda ijtimoiy tarmoqlarda Sirdaryo viloyati, Guliston shahridagi 6-umumta’lim maktabi direktori faoliyati yuzasidan tarqalgan da’volar yuzasidan quyidagilarni ma’lum qilamiz:

Birinchi navbatda, Sirdaryo viloyati Maktabgacha va maktab ta’limi boshqarmasi boshlig‘i birinchi o‘rinbosari A. Abduraxmonov tomonidan maktab direktorlariga pedagoglarni majburiy mehnatga jalb qilish bo‘yicha hech qanday topshiriq berilmagan.

Aytish lozimki, O‘zbekiston Respublikasining “Pedagogning maqomi to‘g‘risida”gi Qonunida pedagogni kasbiy faoliyati bilan bog‘liq bo‘lmagan ishlarga jalb qilish taqiqlanishi aniq ko‘rsatib o‘tilgan. Shuningdek, ularni biron-bir shaklda mehnatga ma’muriy tarzda majburlash qonunda belgilangan tartibda javobgarlikka sabab bo‘ladi.

Ayni vaqtda Sirdaryo viloyati Maktabgacha va maktab ta’limi boshqarmasi tomonidan mazkur murojaatdagi ma’lumotlar o‘rganilmoqda. Tekshiruv natijalari bo‘yicha jamoatchilikka qo‘shimcha ma’lumot taqdim etiladi.