Bugun Maktabgacha va maktab ta’limi vaziri Hilola Umarova boshchiligida navbatdagi “Vazir soati” bo‘lib o‘tdi.

Unda tizimda korrupsiyaviy xavf-xatarlarning oldini olish, iqtidorli yoshlar bilan ishlash tizimini yanada takomillashtirish, navbatdagi attestatsiya hamda “Mahoratli o‘qituvchi – millat tayanchi: uzluksiz kasbiy rivojlantirishning zamonaviy tendensiyalari” mavzusidagi xalqaro ilmiy-amaliy konferensiyani o‘tkazish jarayonlari muhokama qilindi.

Videokonferensiya shaklida tashkil etilgan tadbirda vazir o‘rinbosarlari, vazirlik mas’ullari, hududiy boshqarmalar hamda tizim tashkilotlari rahbarlari ishtirok etdi.

📍 Vazir Hilola Umarova kun tartibidagi masalalarga atroflicha to‘xtalib o‘tar ekan, tizimda korrupsiyaviy xavf-xatarlarni oldini olish maqsadida hozirga qadar 6 ta ta’lim xizmatlari elektron platformasi yaratilganligini qayd etdi.

➖ Qayd etilganidek, xalqaro va mahalliy fan olimpiadalari natijalarining doimiy statistikasini yuritish, olimpiadalar ishtirokchilarining ma’lumotlar bazasini shakllantirib boradigan elektron platforma hamda buyuk allomalar nomi bilan o‘tkaziladigan xalqaro fan olimpiadalari to‘g‘risidagi ma’lumotlar joylashtiriladigan maxsus sayt ishga tushiriladi.

❗️Muhokamalar davomida 2025-yilda Oʻzbekistonda oʻtkazilishi kutilayotgan Buyuk Sharq Renessansi xalqaro olimpiadasi, 2026-yilgi 38-xalqaro informatika (IOI) va 58-xalqaro kimyo olimpiadasini (ICHO) oʻtkazish bilan bogʻliq tashkiliy va kelgusida amalga oshirilishi zarur boʻlgan muhim masalalar tilga olib oʻtildi.