Sirdaryo viloyatida yoshlar hayotida muhim o‘rin tutayotgan “Besh tashabbus olimpiadasi va Paralimpiadasi” loyihasining 2026-yilgi mavsumiga tantanali ravishda start berildi.

Ochilish marosimi Yoshlar markazi faollar zalida o‘tkazilib, respublikaning barcha hududlari onlayn tarzda ulanib, umumxalq bayrami ruhida tashkil etildi.

Mazkur loyiha an’anaviy tarzda beshinchi marotaba o‘tkazilmoqda. Yildan-yilga keng qamrov kasb etib borayotgan ushbu tashabbus yoshlar o‘rtasida sog‘lom turmush tarzini targ‘ib etish, sportga bo‘lgan qiziqishni oshirish, iqtidorli va istiqbolli sportchilarni aniqlash hamda qo‘llab-quvvatlashga xizmat qilmoqda.

Tadbir ko‘tarinki ruh, yoshlarga xos shijoat va sportga bo‘lgan cheksiz mehr bilan o‘tdi. Ochilish marosimida viloyat Sport boshqarmasi boshlig‘i Anvar Buranov, viloyat Maktabgacha va maktab ta’limi boshqarmasi boshlig‘i Nargiza Xolbayeva, viloyat Yoshlar ishlari boshqarmasi boshlig‘i Bobur Akramov hamda hamkor tashkilotlar rahbarlari, sport faxriylari, murabbiylar va o‘quvchi-yoshlar ishtirok etdi.

So‘zga chiqqanlar mazkur loyiha yoshlarning bo‘sh vaqtini mazmunli tashkil etish, ularni sport va sog‘lom hayot sari yetaklash, yurtimizda ommaviy sport harakatini yanada rivojlantirishda muhim platforma ekanini alohida ta’kidlashdi. Shuningdek, hududlarda sport infratuzilmasini rivojlantirish, yoshlar o‘rtasida do‘stona raqobat muhitini shakllantirish va jamoaviylik ruhini mustahkamlash borasida ushbu olimpiada va paralimpiadaning ahamiyati yuqori ekani qayd etildi.

👨🏻‍🦽‍➡️ Ayniqsa, Paralimpiada yo‘nalishining keng qamrovda yo‘lga qo‘yilgani e’tiborga molik. Bu imkoniyati cheklangan yoshlarning sport orqali o‘z iqtidorini namoyon etishi, jamiyat hayotida faol ishtirok etishi hamda o‘ziga bo‘lgan ishonchini mustahkamlashiga xizmat qiladi. Inklyuziv sport tamoyillarini hayotga tatbiq etish orqali teng imkoniyatlar yaratish masalasi ustuvor yo‘nalish sifatida belgilandi.

2026-yilgi mavsum doirasida sportning turli yo‘nalishlari bo‘yicha saralash va final bosqichlari tashkil etilib, eng kuchli va iqtidorli yoshlar aniqlanadi. G‘olib va sovrindorlar munosib taqdirlanib, kelgusida professional sportga yo‘llanma olish imkoniyatiga ega bo‘ladilar.

Sirdaryoda boshlangan ushbu yirik sport harakati yoshlar qalbida yangi maqsad va marralarni zabt etish ishtiyoqini yanada kuchaytirishi shubhasiz. 🖐 “Besh tashabbus olimpiadasi va Paralimpiadasi” — bu nafaqat musobaqa, balki sog‘lom avlod, kuchli iroda va yuksak natijalar sari muhim qadamdir.